DUK NISAN JIFA 10

                                        10

Muryarsa kausashe yace "Meye? " 

Hannunta ta kai kusan rigarta ta rik'e rigar da kyau jikinta na rawa rawa tace "Nima ban sani ba, haka kawai sai na ji idan ban yi kukan ba zuciyata na ciwo, sai na ji ina hakki."

D'an k'ura mata ido ya yi na d'an lokaci sai kuma ya sauke yar k'aramar ajiyar zuciya yace "To koma d'akin ki, ki ci abinci, ki yi karatu, ki yi wanka, ki yi adu'a sai ki kwonta."

Kanta take ta gyad'a masa har ya gama sannan ta juya da sauri ta nufi d'akin nata.

Kansa ya langwab'e ya rakata da kallo, yarintarta, shagwab'arta, innocence d'inta na saka masa jin cewa dole ya bata kariya, dole ya rarasheta, dole ya k'aunaceta.

Juyawar ya yi shima ya fice ya nufi b'angarensa, ko da ya je wanka ya fara yi ya d'auro alwallah sannan ya dawo falonsa.

Sai da ya gama sallar shafa'i da wuturi ya koma k'uryar d'akinsa.

Maimakun ya nemi abinci ya ci ya huta sai ya samu kansa da zama kusa da gadonsa ya k'urawa waje d'aya ido

  " *MAHAIFIYATA*." Y'a fad'a a cen k'asan mak'oshi.

Tabbas soyyayar uwa daban take a cikin zuciyar bawa, kuma tabbas ya ji soyayar wannan mata farat d'aya, sai dai wani baban lamarin da yake gani shine *MAMANSA* . Mama ita ta goya ta sauke, ba dare ba rana, ba zafi ba sanyi ba damana, bata k'yank'yaminsa tun yana hali na a kyankyamce shi, bata kyarar sa tun yana halaya na a kyare shi, bata jin haushin halayan rashin ji irin na yaron da sai uwa ya dace ta yi hakuri da abinta, haka take rungume shi komai datinsa ta sile shi tas komai kazantarsa

Zata iya hanna kanta ci ko sha idan har cikinsa da yinwa, Mama itace bata barci idan bai yi ba

Duka wannan abubuwan ita tana ina kuma tana me? Tabbas ba zai iya wulak'anta ta, ta kowace siga, aman kafin ya iya saka shak'uwa a tsakaninsu sai ya yi fama da kansa.

Dare ya cika sosai zaune domin kuwa har sai da kiraye kirayen sallar asuba suka riske shi ya lalaba ya d'aura wata alwallar ya gabatar da sallar a nan dakinsa ba tare da ya iya fita masalaci ba, ga gajiyar aikin da ya sha hakan ya sa da ya samu baci mai mugun nauyin tsiya ya yi awon gaba da shi.

Bai tashi farkawa ba sai da ya ringa jin kira sama sama.

Mamaki ya ji ya kama shi ainun domin kuwa karfe goma ce ta gota na safe.

Da sauri sauri ya shirya ya saka kayan hausa watau yadi riga da wando wanda akaiwa dinkin malan bahaushe dinkin ya masa das a jikinsa masha Allah.

A lokacin da ya tura baban falon Mama ya tsinkayo dariarta kasa kasa, hakan ya saka shi jin wani farin ciki na dirar masa a zuciyarsa.

Muryar maman ya ji tana fadin "Zainab ai kuwa bana tunanin wad'innan sababin lalen na zamani zasu kamo k'afar jan lallenmu na hausa, ke ni ko ciwon k'afa ya dameni ina k'unsawa nake jin na saku sakayau da ni , aman lallen nan naku na zamani wani lokaci da Bilkisu ta zo da wani ja na dan sakawa yatsutsaina sai na ji sunai min kaikayi da sauri na wanke kar su cire."

Itama dariar ta yi ta ce" Aunty, wai ina labarin mahaifin Babyna?"

Mama ta yi dan murmushi ta ce "Yana nan, yayanta na kaita gaishe shi k'arshen wata wata."

"Wai me ya raba zamanku ?" Zainab ta fad'a tana kallon mama da son sannin dalili.

Mama ta bud'i baki zata yi magana ya idasa shiga baki dayansa da salama a bakinsa.

Zai iya cewa Bilkisu ta fi kama da matar nan, sosai ta dauko kamanin fuskar Zainab.

Tsayinsa ya rage sosai yana gaishe su da kulawa.

Mama da Zainab suka amsa kowace hankalinta na kansa.

Zama ya yi a gefen mama yana dan fadin " Wash."

Mama ta yink'ura ta mik'e ta nufi wajen abinci hakan ya sa daga shi sai Zainab.

Kansa na kallon gefen dakin Bilkisu , fuskarsa tamke  tamkar bai san kalmar daria ba.

A hankali take karantarsa, dubanta ta kai wajen da ya fi kurawa ido hakan ya sa ta budi bakinta a hankali ta ce " Ta tafi makaranta tun karfe bakwai da minti talatin, ta karya da kyar haka kuka bar min yarinya bata son abinci?"

Da sauri ya  kalleta, murmushi ne ya sub'uce masa, niyarsa ya bud'i bakinsa ya bata amsa cikakkiya a kan Bilkisu da k'in cin abinci, sai kuma ya gane wace ta yi maganar ba Mama bace, Tati ce.

A hankali ya kawar da dubansa sannan ya mayar da yannayin murmushinsa cikin cikinsa

Murmushi ta yi a bayane ta kara dora kafarta daya kan daya ta ce" Ba yanda ban yi da ita kan ta yi kwaliya ba, ko dan jan baki ta shafa ba aman ta kiya wai ka hanna, to idan kana hannata dan gyarawa baka so ta samo mana siriki ne? Babyna ta kai wajen da zata fara zance idan wani wajen ne may be har an mata aure shekara goma sha tara ai ta girma " 

Da wani irin sauri yanzunma ya kara kallota, da wani kallo mai hade da kakausan yannayi 

Zai yi magana kennan Mama ta dire masa plat din abinci da koshiya ciki ta juya wajen frij ta dauko masa jus na gida da ta yi da ruwa ta ajiye a gabansa sannan ta zauna tana hade fuska ta ce" oya Bismillah "

A hankali ya ringa sasauta yannayin kallonsa a kan Zainab har ya cire idannuwan nasa daga kanta ya maida kan abincin da Mama ta ajiye masa 

Sai da ya yi da gaske sannan ya maida hankali ya fara tsakurar abincin yana ci , ransa a mugun bace , a kan me zata nemi yon shishigi a rayuwar yarinyar da ta tarar budurwa isashiya? Me ta sani a kan yarinyar da har zata zo ta nemi sakata abinda ba yi take ba?

Da kyar ya iya gama cin abincin Mama ta yi kiran mai aiki ta kwashe

Cike da kulawa mama ta ce" Yaya jikin marar lafiar namu Hisham? Yaushe za'ai masa aikin?"

Hisham ya dan kara gyara zamansa da tishu a hannunsa ya goge bakinsa duda ba wani abu a jikin bakin nasa sannan ya ce" Alhamdulilah, da sauki "

Mama ta ce" Masha Allah haka ake so ai, baka fada min yaushe za'a masa aikin ba?"

Hisham ya kara kallon Mama ya ce" In sha Allah sai ya gama shan maganin da na dora shi sama, wanda zai huce kumburin da ciwon ya yi, idan ya huce kamar nan da sati daya sai a shirya shi a saka shi , idan Allah ya sa aka ci nasarar aikin sai ya yi kamar sati biyu a wajenmu kafin mu salame shi wasu ana yin har sati uku " 

Mama ta ringa gyada kanta, Zainab ta ce" Allah ya sa a yi a sa'a "

Mama ta amsa da "Amen amen ya Allah, to Zainab kuma mutanen da suka zo tare sunna nan zaune da su har a yi a gama ko Niamey din zasu juya? Gani na yi jinyar ta namiji ce ba mace ba, gasu mata ne su biyu, irin wannan ciwonma na ga basa barin mutun wajen marar lafiar "

Zainab ta sauke ajiyar zuciya tana kallon Hisham da ya shiga dadana wayarsa ta ce" Nima abinda nake ta tunani kennan Aunty, gashi a garin nan ba wanda suka sani in dai ba komawa zasu yi ba inaga sai dai ya kama masu hotel har komai ya daidaita yarinyar ce mai sarkafa da kakan, baki ga yanda take kuka a kan rashin lafiar kakan nata ba"

Mama ta ce" Hotel kuma?  Haba dai du dakunnan gidan nan? HISHAM ai ba zasu je Hotel ba gaskiya " ta karashe tana kallon Hisham

Dago kansa ya yi kawai ya kurawa maman ido, yau ya ga ikon Allah, daga jiya zuwa yau wani irin farin ciki da azarbabi da ya samu mamansa abin har mamaki yake bashi, to yanzu bakin matar da ta yi shekara da shekaru bata gani bane take son saukewa kuma? 

"Kin ga, dakunnan cen baki daya fa ba kowa ciki sai gado da sif da bayi, idan dai zasu iya zama da mu gaskiya su zo nan, ina dalili mata da zama a hotel haka kawai bayan da darajarsu "

Murmushi ne ya mamaye fuskarta, kai aman da ta tabata matar DG ta gama abota da ita ta kare, matar akoy son girma da halayan girma , idan ta ce girma tana nufin da manya manyan mutane masu yayan banki, wa'inda suka san darajar yayan banki suke kuma murza su ba tare da jin ciwon kai ba

Da zumudi ta ce" sosai zasu zauna mana, ai zai masu gidan aman ina so a saka masu abubuwan da zasu ji dadin zama da mu, kin san mutanen da suka saba da hutu duda na sarawa gidan nan na HISHAM aman idan ya zamana a wajen da za'a sauke su bai kayatu ba sunna iya nuna min

Mama ta yi murmushi ta ce" ai kau idan har sun yardan ke dai ki fada min kawai kafin su zo zan baki mamaki "

Cike da tausayi yake kallon Mama, a gaskiya a yanzun ya fara tausaya mata, kishirwar rashin yar uwarta a kusa da ita ne ya sakata zama haka a yanzun, tabas ya fara tsoron irin yanda Maman ke bin umarnin kanwarta ba tare da ta saka ayar tambaya ba

Mikewa ya yi  yana kallon agogonsa a sanyaye ya ce" Mama zan je asibiti na ga mararsa lafiar da na yiwa aiki jiya daga nan na dauko Bilkisu karfe nawa take tashi yau? "

Mama ta ce" a babur dinta ta tafi fa yau "

"A babur kuma?" Ya fada yana tsatsare mama da idannuwansa

Zainab kuwa ta janyo mayafinta tana mikewa tana fadin' Aunty bara na bi shi mu je tare dan na ga mai jikin nima sannan na ji yanda suka yanke 

"Yauwa hakanma ya fi  nima bara na ga me zamu yi masu na rana" cewar Mama tana mikewa tana son ta kalli yannayin Hisham aman kuma ta hanna kanta, dan kuwa irin taayuwar nan da ya yi ta tabata yana da ta cewa ya kasa budar baki ne sai ta tambaye shi ko lafia? Ita kuwa so take kusanci ya yi karfi ysakaninsa da mahaifiyarsa

Sarai tana hankalce da irin yannayin magangannun zainab, sai dai ita farin cikin wanzuwar Zainab a cikinsu a irin wannan yannayin ya saka take mayar da dukan wani shaku ko tsoro gefe a zuciyarta

Murmushi ya yi ya dan girgiza kansa a hankali ya juya ya fita

Wajen motar da ya nufa ta je itama ta tsaya

Tana kallo Kader ya bude masa bangaren da zai shiga ya shiga ya zauna, hakan ya sa  ta bude gefensa ta shiga itama ta zauna da wayarta a hannunta

Kader ke tukin sannu a hankali ba tare da yana fera gudu ba hakan ya sa kowa ya nutsu yana abinda yake gabansa

"Bata kai shafe shafen abubuwa a fuskarta ba, hasalima bata fita daga gidanmu dan ta birge wani ba, Dan Allah yan kwanakin da zaki yi tare da mu kar ki rikita min yannayinta " ya fada kasa kasa sosai sannan idannuwansa na kallon tsakiyarsu ya kurawa wajen ido

Zainab ta yi dan murmushi a hankali itama ta ce" Ba zan rikitata ba, aman na maka alkawarin koya mata kwaliya da kwarkwasa domin ita din budurwa ce ba jaririyar da zaka hanna kwaliya ba, Birge wani kam sai ta yi kuma na mata aure in sha Allah, to kai wama ya ce da kai ina da niyar tafia ne bayan na zo gidan d'ana?"

Idanuwansa ya dago da sukai masa dan ja yana kallonta, a hankali yace " Ba na so, kar ki yi."

Itama shi d'in take kallo tace "Kana son ta ne?"

K'ara wara idanuwansa ya yi a saman kanta, a hankali ya tab'e bakinsa ya ce" *AA*."

ZAINAB ta juyar da kanta gefe a hankali ta sauke ajiyar zuciya ta ce" *Har na ji tsoro, kar a je kuna cikin duhu baku sani ba*!"

Sai kuma ta k'ara kallonsa tace "To ka barni na sama mata mai son ta, daidai da ita!" 

Da sauri ya rik'o hannunta na hagu dake kusa da shi yana k'ara tsatsareta da dubansa, kalmar *DUHU* d'in nan ta saka shi a cikin d'ayan biyu, wani irin duhu take nufi? , Muryarsa ciki ciki yace "Anya kuwa? Tati anya idan kin tashi zab'e ba mai kud'i zaki zabo mata ba maimakun masoyi? Anya tati kin san girman soyyaya ko wace kala kuwa?"

Zainab ta tsatsare shi da duba, karon farko da ya rike hannunta tun dawowarta jiya zuwa yau, maganarsa ta sakata a hali na tunani da jin mutuwar jiki, aman sai ta dake, ta murje, ta dan langwab'e kanta ta sanyaya muryarta tace "Tabbas ban san soyayar so na zuciya ba, domin har yanzun da na kawo tsufa ban auna hakan ba dan kuwa na ajiye hakan a matsayin bacin lokoci." 'Dora hannunta na dama saman nasa na ta dora da fad'in "Aman na san ta d'a da uwa."

Murmushi ya yi ya janye hannunsa daga cikin nata ya maida dubansa kacokam bakin titi.

Har sai da motar ta tsaya ya juyo gaba d'ayansa a lokacin da Kader ya  fita a motar ya fuskanceta yace "Tabbas zan iya yi maki biyayya, ina son ki a raina domin haka na ji a zuciyata da na kalle ki, sai dai ina rok'on ki da ki so mutanen nan biyu da zuciya d'aya, sannan ki yi k'ok'arin wanzar da kusanci na d'a da uwa tsakanina da ke, ba zan tab'a iya rainaki ba, ba zan tab'a iya wulak'anta ki ba, wannan marar lafiyan ko da turo su kika yi da sak'o zan dube su domin *uwa* ai *uwa* ce kuma a yanda Mama ta shaida min d'an halak ne ni!"

Yana gama fad'a ya bud'e ya fice a motar hakan ya sakata bin bayansa da kallo. Murmushi ta yi tana dan juyar da kanta gefe guda a bayyane ta furta" Tabas uwa daban take......zakai min biyaya a lokacin da baka shirya ba HISHAM." 

Cike da yannayi na murna  ta dube su su biyu ta ce" Fareeda, Laila, ba zaku gane ba, wai nima na wayi gari da k'anwar mamana a gida harma ta bani damar na saka jan bakin da mama ta hana min da kuma yaya, na kasa daina farin cikin ganinta a kusa da mu."

Laila ta tab'e bakinta tana kallonta bata ce komai ba, Fareeda kuwa tace "Na taya ki murna k'awata, ke bara na amso mana cak d'in ina zuwa."

Fareeda na tafia Laila ta fuskanci Bilkisu tace "Ni kuwa sai na ji sam ban yi zumud'in dawowarta ba, anya kuwa ta dawo da niyyar a fahimci juna? Billy kin ce ta cewa Sir d'anta? A duniyar nan akwai macen da zata kiraye shi da wannan sunnan kuwa bayan Mama? Me ya sa take son saka ki fara bijirewa umarninsa? Kwalliyar ba iyawa bane baki yi ba, ke kike mana, aman dan gudun b'acin ransa sam bakya sakawa ki fito, bana so ya yi fushi da ke Billy."

Bilkisu ta yi murmushi tana lumshe idanuwanta a hankali, cikin murya mai matuk'ar sanyi tace "Dama na san sai kin fad'i haka, domin muna hasashen abu iri d'aya, baki san wani abu ba? Da Babyna take kirana, sannan maganganunta sun tsaurara, ba wai rashin kunya ta yi ba ko bata isa ta ringa hakan ba, a'a, a rayuwar da muke gefen Mama mun san wani wai shi kawaici, kawar da kai a lamarin rayuwa, amma ita sai kawai ana zance Mama na bata labarin irin ci gaban da yaya ya samu na rayuwa sai tace " Ni na san idan ni ban yi kud'i ba a duniya, D'ANA NA CIKINA zai yi." Abun sai ya saka ni kallonta a zabure, aman sai mama ta kore ni. A dukan lamarin nan zan iya ce maki hatta uwar da ta haife ni kallon yar jaririyarta take min, yayana ya kasa fuskantata a matsayina na mace, ban san ko hauka nake ba, ban san ko me ke damuna ba, Laila ya saka a kullum ina k'aryata ki, ina fad'a da ke ido rufe, yana cutar da ni ta hanyar giftawa ta gefena, yana cutar da k'ananun shekaruna ta hanyar yi masu d'aukan watani...."

Dan murmushi ta yi idanuwanta sun kad'a sun yi jajajir k'wallah na neman cika su ta d'ago ta sauke a kan fuskar Laila da mamaki ke neman kasheta, watau du abinda suke fad'a suna cenkowa dai-dai tana ki'n basu fuska ne dan ita kanta a cikin tsaka mai wuya take? Bilkisu ta katse mata tunaninta ta hanyar fad'in "Babu abinda ban iya ba, babu abinda bana fahimta, shekaruna goma sha tara ba kwana tara ba, ba wata tara ba, ina tausaya mana ne, ina gudun sakomu a layin da zan had'amu da hakk'i ne, Laila ina iya halaka tunaninsa, motsinsa katab'us d'insa, Laila ina iya tsayar da numfashinsa domin nima mace ce, mace kuma wace ta san kanta, mace ba sai an koya mata ba, ni ba mahaukaciya bace...ina sane nake tafe kamar makauniya, kurma, kuma bebiya...sannan mahaukaciya! Sai gashi mahaifiyarsa ta bayyana, bayan ta bayyana ina shakun wasu lamura nata, Laila ina son ta, ina jin murnar zuwanta.....Amman da me ta zo? Shin itace alkhairinmu ko akasinsa? Kar ki yi mamaki dan na amshi tayinta ta bayyanar da yan matancina, a yanzu zan baiwa mad'inki damar d'inka min dai-dai da jikina, zan yi kwaliya koda bakina cikin gidanmu....Laila zan k'ara d'an kwatantawa iyayena cewar na d'an girma aman ba wai na girman ba, Laila zan k'ure yayana na ga iya gudun ruwansa."

Hawaye ke fita ta idannuwanta masu zafi ta saka Tishu ta goge a hankali ta kuma fadin" Jibeni, kamar wata wawa daga na fara maganarsa sai hawaye "

"Leila ki tashi ki raka ni wajen mai siyar da waya, ina son na sayi yar k'arama domin a yanzu na yi niyar rashin jin magana a duniyar YAYANA." 

Da mamaki Laila ta ce"...

        🥺🥺🥺🥺