DUK NISAN JIFA 9

                        9

Muryarta raunane tana jin wani irin abu , wani irin baban lamari mai wuyar fasara, a k'asan zuciyarta take jin ciwon irin abinda ya yi, sannan wani irin shayinsa ya d'arsu a zuciyarta, a sanyaye tamkar zata fashe da kuka ta ce da mama "Ki barshi Aunty."

Mama da gaba d'aya hankalinta ya gama tashi ta ringa girgiza kanta ta ce "A'a, ba zan barshi ba, ba zan iya barinsa ya saka kansa a halaka ba, ba zan iya baci ba bayan na san cewar idan har ya yi wasa da lamarin uwa sai ya tozarta a duniya kafin ya tozarta a lahira, ba zan iya rintsawa ba bayan ya yi abinda nake ganin kamar tarbiyata ce ta zo masa a haka! Zainab ba halinsa bane hakan, mai yafiya ne shi, mai bin umarni ne, mai ladabi da biyaya ne, mai jin k'ai ne, ba fushi yake da ke ba, na tabbata yana cikin kokontonki ne a zuciyarsa, ki barni na je na fad'a masa cewar ko me kikai masa tsakaninki ne da mahalicinki , aman idan shi ya yarda ya yi maki Allah zai yi gagawar la'antarsa ne, ki barni na ceci yarona tun kafin fushin zuciya, rudani su saka shi halaka kansa."

K'auna, da soyayar da ta gani a idanuwan Mama na yaronta ya saka Zainab jin jikinta baki d'aya ya yi nauyi da sanyi.

Ashe haka mama ke son HISHAM? ashe haka take motsawa idan abu ya shafe shi ne?

Da sauri zuciyarta, mai kwad'aita mata duniyar ta ce da ita "Ke kuwa idan bata so shi ba ai akwai matsala, ko dan irin daular nan da yaronki na cikinki ke ciki za'a rab'e shi! Dan haka karma hakan ya saka ki jin kamar zaki aikata ba daidai ba."

K'ara cijewa ta yi ta ce" Aunty, ki ji da kyau, in dai ni  na haife shi da cikina na yafe masa, koma me ya yi min a rayuwa na yafe masa, zan yi ta yafe masa dukan laifukansa a gareni, fatana ya yafe min, hakan kuma ba zai faru ba har sai kin kama min, har sai kun kama min, na yi nadama, ba zan kuma ba."

Ajiyar zuciya mama ta ringa saukewa sannan ta ja hannun Zainab.

Suna fitowa sai da suka je ta wajen marar lafiar, nan ta ga sai matarsa da yarta zaune. Irin yanda suka ringa yi mata addu'a da nuna mata farin cikinsu a fili uwa uba irin yanda matar ogansu da kanta ta nemi da ta bata numberta zasu ringa gaisawa  ya sakata jin zata k'ara d'aurar d'amarar yak'o zuciyar yaronta! Nema ta je ba yawon ta zubar ba, ba a kanta aka fara fita nema ba duda a yau ta ga wata kalmar malan bahaushe ta tabbata a gareta watau *Zafin nema baya kawo samu*.

Suna kowama suka tarar da abinci, girki mai rai da lafian da Bilkissu ta girka.

Sosai Zainab ta ci abincin nan domin kuwa yunwa take ji.

Tana cikin ci Mama ta fito da wata kula ta mik'awa Bilkissu dake zaune kusa da Zainab ta ce maza ta kaiwa Kader ya kaiwa masu zaman jinyar.

Ita dai daga zaunen nan take kallon dukan abubuwan dake faruwa.

K'warai ta ji dad'in irin shak'uwarsu, kuma bata da wata damuwa da hakan, damuwarta d'aya ce tak yaro ya san da ita ya dubeta.

Hira suke har wani lokaci inda su dukansu suka fara jin baci na neman d'aukansu, a cikin hirarsu kuwa sosai suke jajanta irin yanayi da Hisham ya nuna wanda baki daya BILKISU ta ji jikinta ya mutu, haka kuma burinta ta ga shigowarsa gidan aman har Mama na neman korata d'akinta bai shigo ba.

A karro na biyu Mama ta ce "Bilkisu."

Baki d'aya ta yi takwaf takwaf da fuskarta tana kallon mama haka kuma ta turo d'an bakinta kamar wace aka yiwa wani abu mai cin rai.

Mama ta yi murmushi ta ce "Ki tashi ki je ki kwonta ba zai dawo da wuri ba fa."

Bilkisu ta ce " Mama, dan Allah ki bani wayarki na kire shi na ji yaya jikinsa, sannan na ji shin ya ci abinci? Sai na je na kwonta."

Ajiyar zuciya mama ta sauke ta k'i bata wayar.

Zainab dake hankalce da wata irin shak'uwa ta daban tsakanin yaronta da Bilkisu ce ta ciro tata wayar ta mik'a mata tana fadin "Ban san ba ko yana daga bakuwar number? Yi kiransa babyna."

Amsa Bilkisu ta yi da hannu biyu tana kallon yannayin fuskar mama dan kar ta yi laifi.

Gannin mama bata d'aure Fuska ba sai ta yi murmushi ta ce" Na gode Tati, bara na fara yi masa mesage zai d'aga idan ya gani."

Hakan ne kuwa mesage ta tura kamar haka " Asalamu alaika yayana, ina yini, ina gajiya? Ina son kiran numberka Bilkisu ce." 

Rik'e wayar ta yi a hannunta da niyyar idan aka d'auki kamar minti goma sai ta gwada kiran ta san zuwa lokacin ya karanta mesage din.

Sai dai ba'a kai ga yin minti goman ba wayar ta d'auki kuwa.

Da sauri ta duba mai kiran, sai da ta gyara zamanta, ta gyara nutsuwarta....baban abinda ita kanta bata san ta gyara ba shine muryarta ta d'aga kiran muryarta a mace ta furta "Yaya."

Muryan ba nata kad.ai bane a mace, duda tasa na fita ne da yanayi na ransa a b'ace, ga d'an zafi zafi da son sanin amsar tambayarsa ya shiga fadin "Wa ya baki waya? Me kike da waya? Wani kika kira? Ashe ba zaki ji maganana ba? Ba zaki kwantar min da hankalina ba? Bilkis da wa kike waya a irin wannan lokacin?"

Da sauri ta ce "Yaya, aa, ba waya nake da kowa ba na kasa kwantawa ne ganin zaka kuma kwana a wajen aiki bayan duk tsaurinta baka kwana biyu a waje, shine na ce tati ta bani wayarta na yi kiran ka."

"Wacece Tati kuma?" Ya kuma tambayarta  a d'an hasale.

A hankali ta raunata muryarta ta ce" Mama 2 " domin du a tunaninta ko laifi ta yi da ta kirayi mahaifiyarsa Tati?

Dan shiru ya yi, hakan ya saka ta sare ta k'ara nutsuwa tana jiran jin abinda zai fad'a , a hankali cikin wata sansanyar murya ya ce "Kina son ta ne?"

Bilkisu ta k'ara saurarawa , bata fahimci tambayarsa ba sam , hakan ya hana mata bashi amsa.

A hankali ya kuma fad'in "Kin ga baki santa ba fa, kar ki shak'u da ita ta tafi ta barki Bilkisuna, idan ta yi tafiarta tana d'aukan lokaci bata waiwayi masoyanta ba, a kad'an tana d'aukan shekaru masu yawan gaske, mai yiwuwa sai kin mutu ko ta mutu labari ya tardo ki, kar ki shak'u da ita Bilkis dan kuwa ko kiranta kika yi ba d'agawa zata ringa yi ba, ko ta d'aga a gagauce ta kashe maki kira, idan kika shak'u da ita zaki zo kina damuna da rigimar ina take? Yaushe zata zo? Ko a kaiki ki mata hutun makaranta, kinga damar kwantawa rashin lafia a kan rashinta, idan hakan ta faru ina zan shiga na ji sanyi?"

Ita kanta bata san cewa idanuwanta a lumshe suke a irin wannan lokacin ba, sauraron kalamansa take d'aya bayan d'aya tana yi masu waje a wajen da bata san akoy gininsa a cikin k'irjinta ba tana adanawa, bata san cewa da hannu bibiyu take rik'e da wayar a kunnanta ba, bata san cewa irin zaman da ta yi na nuni da irin yanda ta tsumu ta gama fita a hayacinba ba.

Kunya ce ke lulub'e Mama sakamakon ganin irin yanda Zainab ta mayar da Bilkisu tamkar wani abin karanta na makaranta wanda take son had'a kalmomi dan ta fahimci abinda yake nufi, irin haka d'in nan da take amsa wayar yayanta ko kai makaho ne idan kunnayenka suka jiyo maka irin muryar da aka yi anfani da ita dan amsawar in dai har kana da k'arfin ji to fa tabbas zaka dasa ayar tambaya koma ka gama yanke hukunci a kan lamarin

Bare da idanuwansu, haka kuma Allah ya hore masu k'arfin ji sosai.

D'an gyaran Murya mama ta yi ta ce "Bilkisu kin same shin kuwa?"

Firgigit ta yi kamar an watsa mata ruwa ta d'ago shanyayun idanuwanta da suka d'auki launi a yanzu yanzu suka dan cenza kala sannan suke d'auke da ruwa ruwa a cikinsu.

A hankali ta ringa girgiza kanta muryarta sanyaye ta ce " mTa ce min ba zata kuma barinmu ba, ta ce min mu kad'ai gareta, ta ce min mu ne duniyarta, ta ce min nima yanzun ina da tati kuma Mama 2, yayana ba zata kuma barinmu ba."

D'an murmushi ya yi yana girgiza kansa kawai ya ce "Kin ci abinci?"

Bilkisu ta d'an yi shiru sai kuma ta shiga kame kame ta ce " Eh, am Eh na ci sosaima."

Murmushi ya kuma yi yana jin kewarta na k'ara shigarsa na iya jiya da yau kawai, hakan ya saka shi mik'ewa daga zaunen da yake ya ce" Gani nan zuwa, ki cewa cikin ki na ce yama shirya domin kuwa zan k'ara loda masa cima."

Ido ta zarro sai kuma ta yi yar daria tana rike da wayar, sai kuma ta yi shiru tana kallon su Mama.

Ido cikin ido ta ga du sun kura mata ido hakan ya saka ta dan daburce a hankali ta ce "Au, sannun ku su Mama" 

Mama ta kawar da kanta tana ta tunanin wannan ikon Allah, ta kasa cewa komai, wai sannun su, sannunta dai ita da ta gama makalkale waya, matse jiki da murya, sannunta dai ita uwar mararsa kunyar dunia.

Zainab ta raka Bilkisu da kallo.

Tana tafia d'akinta ta kai dubanta wajen Mama da yannayi na ayar tambaya ta ce " Aunty, ko dai soyaya ake Babyna da Hisham? "

Da sauri mama ta girgiza kanta tana kallonta ta ce" ko d'aya Zainab, kawai shak'uwa ce tsakaninsu, domin nima da na ga wasu abubuwan na sha titsiye su aman ba wanda ya nunan da maganar wata aba wai soyaya, kawai shak'uwa ce na san dan basu da yawa ne"

Murmushi Zainab ta ringa yi bata kuma cewa komai ba ta mik'e ta nufi d'akin Bilkisu.

Tana zaune bakin gado Bilkisu ta fito daga wanka d'aure da tawul a jikinta.

Sam bata lura da mutun zaune ba ta nufi wajen kayanta da sauri ta ciro doguwar riga da Pant.

Pant d'in ta fara sakawa sannan ta zira rigar ta shanya tawul din.

Ta juyo da niyar d'aukan abin busar da kai da ga Zainab zaune tana binta da kallo tana murmushi.

Gaskiya tsarin halitar yarinyar ya firgitata fiye da tunanin bawa, tabas yar na kama da su, sai dai tsarin halitarta ta dame su ta shanye, bata tab'a hasashen ta kai haka ba, uwa uba gashinta ya had'u na filanin usil baki sid'ik da shi ga gyara da yake samu.

Sai da Bilkisu ta zaro ido sannan ta dan rufe fuskarta na kunya sai kuma ta ce "Lah , Tati ban ganki ba walahi, wani abu zan kawo maki  sauri nake kar yaya ya tardo ni da wancen kayan na makaranta ya min fad'a, ya hanna min zama da kayan makaranta a gida."

Zainab ta mik'e ta d'auki abin busar da gashin tana murmushi ta zaunar da ita ta ce" zauna na busar maki da kan naki "

Ai kau zama ta yi tana murmushin itama.

Zainab ta jona ta shiga busar mata tana caje mata kan domin abin busar da gashin mai hade da macaji ne.

A hankali ta ce" Babyna, na tambaye ki mana ko zaki taimaka min?"

Bilkisu ta dan dago da kanta ta sakar mata murmushi tana kallonta.

Zainab ta mayar da kan nata kasa ta ci gaba da busar da gashin nata ta ce" yayanki ya yi fushi da ni, ya tsane ni, ya kasa gafarta min, ko zaki taya ni lalaba shi ya yafe min? Na jima ban dawo ba, na gane kurena ba zan kuma ba, ko kina fahimtar yarena? " 

Ta fad'a tana k'ara kallon Bilkisu.

Bilkisu ta yi murmushi 

tana cire dubanta a kanta, kwarai ta san me take nufi kuma ta san ta batawa yayanta rai, ta san yana cikin halin fushi ne dalilinta, kuma ita bata ga laifinsa ba, abu daya zai sakata dagewa ta saka shi saukowa shi ne "Mahaifiya" , Uwa uwa ce, bata tunanin a nan gidan duniya akoy abinda Mama zata yi mata ta kasa yafe mata komai girmansa, koda kuwa yankata ta yi

Zagayowa Zainab ta yi ta rage tsayinta sosai tana kallon Bilkisu ta dago habarta ta ce" yannayinki sai ya fara bani tsoro, shin kema zaki taya yayanki yin fushi da ni ne? "

BILKISU ta lumshe idannuwanta ta bude tana jin kaunar matar a ranta, wannan uwa ce ga yayanta, wannan ita ta haifi yayanta, itace jefi jefi suke ji a waya, yau gata a gabansu tun da rana har yanzun bata tafiarta ba, 

Murmushi ta sakarwa Zainab a hankali ta ce" Ba fushi yake yi ba, zai yi hakuri ne ni na sani Tati "

Zainab ta lumshe idannuwanta ta juya wajen kayan Bilkisu

Kayan kwakiya ne cike da wajen sai dai bata ga alamun ana anfani da su ba

Jan baki mai ruwan ja mai haske ta dauko

Bilkisu na kallonta ta bude ta dan dago habarta a hankali ta rike ta shafa mata shi a lebenta baki daya, shafawa irin na kwararu , shafawa daidai da lebunanta

A hankali ta mayar ta dauko jagira

Umartarta ta yi kan ta sada idannuwanta

Bilkisu kam abin bako ne a rayuwarta, hakan ya saja cike da zumudi ta sada idannuwan nata

Saman idon kadan ta shafa mata ja girar baka watau ta yi mata eye liner da shi sannan ta bata ta ce ta sakawa idannuwanta

Abinka da wace ba kwaliyar take ba sai fuskar tata ta fito a iya wannan kawai da akaiwa fuskar ta yi wani irin kyau da ita

Gashin kan nata ta kai mata shi kasa sosai ta saka mata dan ribom karami sannan ta dauki dan kwali ta shiga warwarewa zata d'aura mata kennan suka ji buga d'akin a hankali.

Da sauri Bilkisu ta kai dubanta wajen k'ofar, sai kuma ta kalli Zainab, a hankali ta ce "Waye?"

Shirun da ya yi ya sakata gane shi ne, ya tsani ya bugan nan ta wani ce masa waye kamar wani sa'anta.

Da sauri ta mik'e tsaye da niyyar zuwa ta bud'e, sai dai Zainab ta rik'o hannunta ta k'i bata damar yin hakan.

Turare ta juya ta d'auko mata ta shiga fesa mata shi , sai da ya shiga suturarta sosai sannan ta saketa bayan ta yi mata murmushi ta juya ita ta je ta bud'e k'ofar maimakun ta bari Bilkisun ta bud'e.

Ido hud'u suka yi shi da ita, kallon cikin ido na wasu yan sekwani kafin ya yi gagawar cire idanuwansa a cikin nata ya sada dubansa.

Sai da ya lumshe idanuwansa sannan ya ce " *Barka da warhaka Tati*."

Ajiyar zuciya ta sauke tana kallon wannan zaratan namijin wai nata ne, danta ne, da ta san abinda ta kunce a zanin goyo ta yar zai zama haka da bata yada ba.

A sanyaye ta furta "Yaya gajiya HISHAM?"

bai bata amsa ba sai k'ara sada dubansa da ya yi yana jin zuciyarsa na bugawa.

A hankali ta rab'a gefensa ta wuce.Tana yin gaba ya bita da kallo har ta k'arasa kusa da d'akin Mama.

Juyowa ta yi dan ta k'ara kallonsa, idanuwansu suka kuma had'ewa.

Wannan kallon ita ta fara cire dubanta a hankali ta shige d'akin Mama.

Bai san wani tunani zai yi ba dan haka ya juyo da niyyar kuma buga d'akin Bilkisu, domin rabonsa da shiga d'akinta kai tsaye har ya manta.

Turus ya yi da dubansa a saman fuskarta, cenjin da ya gani ya girmama a idanuwansa domin ita din ba ma'abociyar shafa jan baki da kwali bace.

Ido cikin ido yake jifanta da wani duba wanda bata san fasararsa ba.

A hankali ya kai dubansa saman leb'enta da ya sha jan bakin nan ja

"Ya salam." Ya ji zuciyarsa na fad'a a hankali.

Da sauri ya so juyawa sai dai sam k'afafuwansa da dubansa suka kek'yashe knasa suka ce basu san zancen ba.

A hankali ya ringa jin k'afarsa na son yi masa rawa hakama dukan wata jarumatarsa.

Murmushin dake tsayar da numfashinsa ta saki tana kallonsa muryarta a shagwab'e ta ce "Yaya ko? Tambayi mama wollah na tab'a aman ba da yawa ba."

"Wayo Allahna, na shiga uku, waye ya mata kwalliyar nan? Wa ya ce da ita ta yi magana a haka?" Ya ringa fad'a a k'asan zuciyarsa idanuwansa na k'ara tsayawa k'yam a kan leb'unanta.

Kin girma ne? Kin kai ne?' Ya kuma tambayar kansa.

A hankali ya ciro tishu daga aljihun dogon wandon dake jikinsa na geans.

Yana kallonta ba tare da ya yi mata magana ba ya shiga goge mata jan bakin yana kallon yanda ta mik'o masa bakin ba tare da ta yi gardama ba.

Abinda ya kawo shi ya kasa yi, ledar dake hannunsa ya iya mik'a mata ba tare da ya ce komai ba, dama ledar hud'u ce aka masa, d'aya ta Mama, d'aya ta Kader, d'aya ta Bilkisu, d'ayar kuwa tasa.

A hankali ya saka hannunsa ya rik'e nata ya kuma kalleta, d'an mak'oloton wuyansa ne ya ringa d'an kai kawo, kamar wanda ke had'iyar yawu kamar wanda ke had'iye magana yana hanata fita 'karfi da yaji.

Da k'yar ya iya cewa "Ki yi karatu kin ji?"

Ajiyar zuciya ta sauke tana gyad'a masa kanta, juyawa ya yi yana tafiar nan dake halakata.

K'uri ta bi shi da ido, sam ta k'i shiga ciki ko ta je wajen su Mama.

A lokacin da ya k'arasa kusan k'ofar fita ya ja ya tsaya ya juyo gaba d'ayansa. Had'e bayansa ya yi da jikin k'ofar ya d'ago hannunsa na dama ya kai daidai k'ahon zuciyarsa ya rage girman idanuwansa sosai yana kallonta kamar yanda take kallonsa.

Hannunsa na hagu ya saka  ya fito ta da shi yana sakin ajiyar zuciya yana k'ara bin rigar dake jikinta, tsarin tafiarta komai nata da kallo.

Ya sani sarai cewa kallon nan da yake mata ya zarce misali, aman cikin ikon Allah ya kasa cire dubansa a kan wannan yar ficiciyar 'yar.

A hankali take k'ara kusanta kanta da wajen da yake tsaye har ta k'araso ta tsaya tana kallonsa.

Muryarsa a sanyaye ya ce "Billyna, ki daina kwalliya."

K'ara kallonsa take da manyan idanuwanta tamkar na mage. A hankali ya k'ara furta "Kin ji?"

Kai ta ringa gyad'awa tana jin kukan na gaf da zuwa, ji take zuciyarta ta cinkushe wannan kukan da take yi ma gaf da b'arkewa a kowani lokaci.

A hankali ta juya da niyyar tafiya ya kuma fad'in "Bilkisu." 

Cak ta tsaya tana haki dan mayar da kukan kuma ta kasa amsawa, kiran sunanta da ya kuma yi a cen k'asan mak'oshinsa ya sakata juyowa , sai da ta d'ago dubanta ta sauke saman fuskarsa, tun daga kan har takalman dake k'afafuwansa k'afa ciki ta bi da kallo sai kawai ta bud'i bakinta ta b'arke da kuka, kuka fa mai sauti , tsakaninta da Allah kuma tana kallonsa yana kallonta hawaye na bin gefe da gefen kumatunta.

Da sauri ya wara idanuwansa a saman kanta, nan da nan ya tuno irin yanayin da ya ke son jefa kansa a ciki a tsayen nan, had'e fuska ya yi kamar wanda zai shigeta da dukan mutuwa, ya had'e muryarsa sosai a dake ya ce" ...

*Masha'Allah.*