KIBIYAR AJALI 5

 *KIBIYAR AJALI.....!!!!*

_(Sulke baya tsare ta sai ta wuce)_

          🏹👑👩‍❤️‍👨💝

MALLAKAR:- NANA HAFSAT*

          *(MISS XOXO)*

*©️®️ZAFAFA 5 2021*

*BABI NA 5*

(LAST FREE PAGE: SHAFIN KARSHE NA KYAUTA)

          ••.        ••.        ••  

   Sana'ar da Gajiyalle take dora min ta karbe ni sosai ina jin dad'in yin ta fiye da komai a rayuwa ta, har wasu kauyukan nake bin masu talla muje, gashi abin burgewa duk abin da na daga sai an siya. Babu laifi duk sanda na kai kudi cas ina samun abincin da zanci na koshi, sabanin idan na kashe wasu ranar sai naci duka kuma duk da haka sai na takura mata ta dora min na fita da kayan na siyar.

Bangaran Baffa kuwa ya rasa yadda zai yi dani da Gajiyalle akan na shiga makaranta amman muka kafe, gashi mai garin ya sanya idanuwa sosai, dan mutane sun fara saduda suna ta barin yaran su na zuwa.

Wata rana na dawo daga talla na tarar da Baffa zaune a kofar gida ya zabga tagumi, nayi saurin karasawa kusa da shi tare da aje farantin kayan kolin nawa, hannu nasa na zare tagumin nasa tare da ciro cinikin ina karkada masa shi baki na a washe kamar mai tallar makilin. Yaki kallon kudin na kuma kaiwa kusa da fuskar sa amman duk da haka yaki kallansu, hakan ya tabbatar min da cewa ransa a bace yake.

“Baffa wai baka ga cinikin da nayo ba? Sai nuna maka nake yi kaki kallo na.”

Cikin sanyin muryarsa yace dani.

“Tashi ki shiga ciki tun kafin ta jiyo muryarki tazo ku tara min mutane.”

“Amma dai Baffa an bata maka rai ko?” 

Yayi shiru.

“Haba Baffa ko ni nayi maka laifin ne?” 

Abin mamaki sai naga ya yi saurin daga kai alamar 'eh' ni ce.

“Na higa uku ni Dije me nayi maka Baffa? Koma dai meye ni nasan ban kula ba nayi maka shi dan Allah ka yafe min kaji Baffa na?”

Baffa ya ja numfashi tare da kallo na karo na biyu tun zama na kusa dashi, yana shirin yi min magana muka ji muryar Gajiyalle a kan mu tazo ta rike kogu tana karkada jiki da alama masifa take ji da ita. Hannu ta miko min alamun na bata nayi dariya saboda nasan su ta biyo saman, ai idan har kasan Gajiyalle to idan ta yi maka wannan tsayuwar indai baka bata abin da take so ba, babu shakka ka taro babban aiki. Na dora mata kudin ta hau lissafawa, ta gama sai kuma ta saki guda tana raye-raye.

“Ahaiyeeee nanayeeee cas! Tabbas Dije kina da goshi ke din mai sa'a ce walle, nayi miki alkawarin samira mai uku aradu lokacin bikin ki, ke harda kumbo da kwalla tasa da fanteka heeee ras!... Dije ta Gajiyalle mai kayan koli.”

Tana gamawa ta juya tare da komawa gida tana lissafa kudin ta cike da farin ciki. Ni kuma na sake mikewa zan tashi Baffa ya yi saurin dakatar dani yana cewa.

“Ummina ki zauna magana zamu yi.”

“Allah yasa dangin inna ta zaka kai ni Baffa.”

Ya yi murmushi yasan ina son zuwa amman baya so ya kai ni su rike ni gabaki d'aya dan dama duk haushin Gajiyalle suke yi dan suna jin labarin yadda take gana min azaba.

“Ummina ke nan, zan kai ki dangin innarki amman da sharadi guda daya.” 

Cikin zumudi nace.

“Fadi Baffa ko meye zan yi indai zaka kai ni.”

“Yauwa Ummina, sharadin shine ki yadda ki fara zuwa makarantar can, kinga ko dazu sai da mai unguwa ya yi min maganar cewa mai gari yana sanya ido akan duk wadanda suka kai yaran su. Kinga yana ganin mutunci na dan Allah ki yadda ki fara zuwa.”

Tunda ya fara magana nake yatsina fuska tsanar mai garin ta fara shiga zuciya ta, yana kaiwa karshe kuwa na cona baki gaba ina cewa.

“Rabu da mai garin nan Baffa, yo hi makarantar ya yi da zai ihi mutane akan zuwa? Ni wallahi aradun Allah ban zuwa, nama fasa zama irin na radiyo d'in da na talabijin d'in tunda sune suke sake janyowa kace sai naje.”

“Ikon Allah! Ummina ni ba haka nake nufi ba, kinga wan....” 

Nayi saurin mikewa.

“Baffa ni fa bazan yi bokon nan ba, kaima fa baka yi ba kuma kaga nan da rai da lafiyarka, ni wallahi bana son makarantar can.” 

Na shige gida ina buga kafa alamar bana so ban yarda ba. Haka Baffa ya rabu dani, ya zamana suna yar buya shi da mai gari dan besan wace karyar zai yi ba dan ya kare kansa a wajan shi. Ni kuwa naci gaba da yiwa Gajiyalle talla yanzu har wani mutunci muke yi da ita zamu yi jira harda shewa mu tafa da hannaye cikin nishad'i.

Mudikalle ma babu ruwan shi da makarantar, dan a lokacin da Baffa ya bashi fom dinsa a gurin ya daga sama ya yi mata gutsin-gutsin tare da watsar da su iska ta tarwatsa. Kuka ne kadai Baffa be yi ba, hakan ne kuma ya hana shi bani tawa dan yasan nima zan iya yin yadda Mudi ya yi.

Ranar Litinin da safe naje siyo koko da kosai ina shayo kwanar da zata kai ni wajan makaranta na taci karo da wannan malamin da ya tsinko bulala zai doke ni, amman nayi kamar ban gane shi ba naje zan wuce kawai naji ya tsaidani.

“Zo nan yar tallah.”

Haushi ya kamani da naji irin sunan da ya kira ni dashi, na riko kuguna tare da cewa.

“Ba suna na bane, idan zaka kira ni ka ce Dije ko tagala ko yar gatan Baffa da Gajiyalle.”

“Bazan kiraki da su din ba, yar tallah zan fada ko zaki doke ni?”

Nasa yatsa a baki ina ciza naga alamar mutumin nan bashi da mutunci kuma babu abinda ya hada ni dashi bare nace ga dalilin da yasa yake takura min.

“Toh ai hi kenan sai kai ta fada ba sai na amsa maka ba sannan zaka ji dadin kuma gaya min ba.”

Ban ankara ba naji ya dauke min keyata da duka, nayi saurin dafe gurin ina furta.

“Kut! Kai... Kai... Kai! Allah ya...” Ban karasa ba ya kuma sakar min wani wanda yafi na farkon.

“Ni zaki zaga dan ubanki? Ke baki da mutunci ko? Toh na rantse da Allah zan yi maganinki a cikin kauyan nan naku. Daman tunda na ganki nasan baki da tarbiya, zo ki wuce ki shiga ajin nan daga yau zan koya miki tarbiya farar aljana da idanuwanki kamar na mage ta ga bera.”

“Ajin me zan shiga?” Nayi furucin ba tare da na san ya fito ba.

“Ya za ai kisan aji kina yar tallah? Yau dai nake son ki shiga kisan ko menene shi.”

“Lallai ma, indai makaranta ce bazan higa ba ana dole ne? Toh na gaya maka Baffa ma ya yi ya gama bare kai da ba uba na ba ma.”

Ina gama fadar haka na faki idanunsa nace kafa mai naci ban baki ba, na ruga da gudu kamar ance ya biyo ni. Malam Auwal ya bini da kallon sakarya ni kuma har da yi masa gwalo, na shiga gida ina dariyar mugunta. Gajiyalle ta karbi koko da kosan ta sammin nasha daga nan nayi tafiya ta talla. Haka dai rayuwa ta taci gaba da kasan cewa na kasa tsayawa na karbi shawarar da Baffa yake bani. 

Sai da yaga da gaske nake bazan yi bokon ba sannan ya dako fom di na ya bani yace duk abinda naga dama naje nayi, ganin ransa ya yi mugun baci ya fita a harkata duk wasu abubuwa ya dena yi min sannan ne na fara tunanin yadda zan yi na samar masa da farin ciki ko Allah zai sa ya dawo da jin dadin sa gare ni.

Kwana biyu na dena yin talla, tun Gajiyalle na daukar abin wasa har dai taga na dage nace ni Baffa zan farantawa rai, boko zan shiga ko da ba'a so nayi zan yi ko zan mutu a ciki. Tun daga lokacin ta dawo da bani azaba wacce tafi ta baya, amman nima na kafe cewar bazan yi talla ba sai dai ta kashe ni.

*GOVERNMENT GIRLS JUNIOR PRIMARY/SENIOR SCHOOL DURBUN*

   *Na* dubi garejin makarantar mu dake d’auke da wasu watsalallun rubutu da bansan me suke nufi ba. Gaba na ya yanke ya fadi. Banason bokon nan amma ya zanyi? Cikar buri na da farin cikin Baffa na shine ya sanya na yanke zuciar zuwa makarantar. Shaf na mance ban dakko takardar shedar kai dan makarantar bane. Na manto ta a gida. Bakwa mantawa ba gani nake ba amfanin da za tai. Domin dazu na gutsiri ‘kasan ta ma na kwakwulo dattin kunne na. Fankan fankan na shiga cikin makarantar ina bin dandazon dalibai da kallo, Suma yawancin su ni suke kalla, Menene suke kallo na haka tamkar basu san Dijen Baffan ta ba? Murgud’a baki nayi na dankara musu harara, Cikin haka sai ga Siyama k’awata taci ado cikin kaya irin na sauran daliban. Ja na tayi gefe tana raba idanuwa,

 “Dijengala mai kike anan? Ko waje na kiki zo? Ki bari a..”

 “Dalla yi min shiru. Wajen ki? Saboda me zan zo wajen ki? Nan ashe Nana ta hada partyn sunan gidan su an gayyaci kowa kunje kunci dadi shine ba wanda ya gaya min, Taron munafukai.”

Siyama zata rike min hannu na wafce ina tsirtar da yawu a gefe,

 “Banzariya kawai. Ai in gaya miki kawaye zan sake, Kuma sai nabi kowannen ku nayi ‘kuli-kulin kubra da ku.” 

 “Kai su waye anan... Wacece wannan siyama ce?”

Oh nagane shi shegen malamin nan ne mai gashin hab’a irin na bunsurun Gajiyalle. Tahowa yake wajen mu yana cilla bulalar sa sama. Bazan taba mantawa da karfen d’aya saukarwa kai na ciwon sati ba. Na masa tofin Allah tsine yafi dubu. Na wulkita idanu na sama na zabga masa harara. K’arasowa yai wajen mu yana kallon Siyama kafin ya mai da duban sa kai na,

 “Na kore ku yafi a kirga, Nace banda talla, Banda talla. Yan talla su dena zuwa da safe sai lokacin break yayi. Kina jina? Ko kuwa kunnen k’ashi ne da ke?”

Daga hannu nai zai zabga min bulala naja baya ina binsa da kallon ya haka?

 “Ha’ah magana kake ko zubar gudawa? Uhm.”

“Ke da wa kike? Siyama ke kika kawo mana wannan marar kunyar?”

Siyama tai saurin girgiza kai tana ja baya. Sauran yan makarantar suka yo kanmu suna kallon mu. Naja dankwalin kai na nai damara dashi na dira agaban sa, 

 “Dan kaji nima nan daliba ce kamar kowa, Banyi niyyar fara zuwa makarantar bane sai yau. Kuma ni ba marar kunya bace ehe..”

Ya-yo kai na zai make ni wata malama ta dakatar dashi,

 “Haba Malam Auwal meye haka?”

“Malama Mardiyya ki bari na zazzabga mata mari, Irin marasa kunyar yarannanne, Kangararru wanda basajin maganar iyayen su. Bakya jin me take cewa. Wannan k’aramar yarinyar ni zata gayawa magana.?”

Ya karasa fada yana kwafa. Malama Mardiyya ta riko hannu na tana janyo ni kusa da ita. Hannun ta laushi ba irin nawa ba duk yayi kanta ya daddauje. Bata kyamata ta ta janyo ni jikin ta? Kallo na tayi kafin tace,

 “Kanwata makarantar nan kikazo koyan karatu ko kuwa wani abun ne daban ya kawo ki?”

Saurin girgiza kai nayi,

 “Karatu nazo koya, Nima d’aliba ce kamar kowa, Kawai dai ban fara zuwa da wuri bane sai yau.”

Malama Mardiyya ta ka’da kai kafin tace,

 “Toh ina uniform dinki?”

Zare idanu nayi jin abunda ta fada da bansan ko menene ba, Matsawa nai ina raba idanuwa,

 “Inifan? Meye shi Malama?”

Sauran yara suka sa daria, Na juya na zabga musu harara, Domin sun san hali na sarai yanzun sai na hada gagarumin fa’dan da sai mai gari jamilu yayi shari’a. 

Malama Mardiyya tayi murmushin da kyakkyawan hakorin makkan ta ya bayyana, Inaga irin dan nera goman nanne da Yusha’u ke sawowa a birni ya sassaidawa mutan garin mu. 

 “U-ni-form ake cewa kinji kanwata? Yana nufin kayan makaranta iri d’aya da sauran yara suka sa kinji? Ya sunan ki ne?”

“Yu-nun-fan!”

Na fada a hankali ina dashe baki kafin na sake cewa,

 “Sunana da yawa, Baba na na kira na da Ummi na, Saboda kasancewar sunan mahaifiyar sa da naci. Matar baba na na kira na da Dije itada wasu tsirarrun mutane a karkarar nan, Mafi yawancin yan karkarar nan na kira na da Dijengala ko Ta mai gari. Kawaye na da matasan karkarar nan na min laqabi da Dije Oganniya...”

Na karasa fada ina dashe baki. Malama Mardiyya da sauran mutane suka kada kai, Gaba d’aya sun zubamin ido. To ni Meye nawa tunda Sunana ta tambaya kuma du sunaye na ne. Malama Mardiyya tace,

 “Dakyau! Kenan sunan ki Khadija?”

Na daga kai alamun Eh!

 “Wow nice name! Toh Ina takardar shedar ke yar makarantar nan ce?”

‘Anzo wajen’ Na fada a hankali ina nannada d’ankwalin kai na.

 “Iya gida yasin, au wai so ake yi?”

Gyada kai tayi! Na kwasa aguje ban ce komai ba na tafi gida na dakko. Ina tafiya ina waiwayen su, Na hango Malam auwal din ya matsa kusa da Malama Mardiyya suna magana. 

 “Dan bakin ciki hede ya mutu, Ba fasawa karatu ne dai he anyi, Me kayin giginya kawai.”

Da gudu na shige gida ina haki, Gajiyalle na tsakar gidan mu tana dama kunu. 

 “Yan bokoko! Mu dai babu ruwan mu idan aka dakko abun kunya.”

Sam bangane me take nufi na da dakko abun kunya ba. Nidai nai shigewa ta dakin Baffa. Akan taga na gano takardar inda na dora ta dazu. Dauka nayi da gudu zan fice sai kuma na dawo na tsugunna a kusa da Gajiyalle Ina lashe lebe,

 “Dan sanmun kunun.”

Harara ta dankaramin tana janye bokitin kunun daga kusa dani,

 “Matsa kafin na hanbare ki. Dan uban ki ubanki ne ya sayo da Za’a baki? Ba dai kin dena tallen ba.? Bazan baki ba ko zaki mutu.”

K’wafa nayi na mike ina jujjuya idanu na,

 “A hayye! Dijengala ta mai gari, Ba auren talaka ba, Talaka mai sara da sassake. Gajiyalle ki bani kar na auri chiyamin din birni ginin bulo. Ki ciji yatsa.”

“A mafarki? Nace a mafarki? Wane shashashan ne zai aure ki? Zaki matsa daga kai na ko sai na lakada miki na jaki?”

Tabe baki nayi, Na fice aguje na koma makaranta. Ina zuwa na tarar an tara yan makarantar ana koya musu wani abu kamar waka an jera su a layi. Malama Mardiyya ta yafito ni tace na tsaya a bayan Adaman liman. 

 “Assembly ake yi..”

 “Assambuli? Me kenan da hausa Malama?”

“Kowa da kika gani a jere, Kowa ajujuwan su daban. Kema a bayan yan ajin ku kike, Wasun su sun iya Abun da ake fada mai taken ‘National anthem’ Taken najeriya kenan. Yana da matuk’ar muhimmanci.”

Nifa gaba d’aya ba gane abunda take cewa nake ba, Gashi bana shiru na cuci kai na akan abunda ban gane ba. Na dube ta ahankali nace,

 “Malama yasin bangane duk abunda kike fada ba”

 “Babu damuwa Khadija.. Idan an tashi break kizo na miki bayani. Yanzu dai ina takardar?”

Mika mata nayi, a cukurkude tayi dik’in-di’kin da dau’dar kunne na dana sassakato, Malama Mardiyya ta zare idanu tana bin takardar da kallo,

 “Khadija ya haka? Me kika goge da ita tayi datti haka?”

Kunya ta mamaye ni, Na sunkuyar da kai na kasa. A hankali nace,

 “Yasin kunne na na gogo. Da da gashin kaza nake yi. Toh mugun kansilar garin nan yasa an yahe hyarar kududdufin baki d’aya wai tuk’a tuk’a (borehole) Za’ai awajen.”

Malama Mardiyya ta kada kai, Kafin ta karba ta mikar da ita. Komawa tayi gaban makarantar tana bin mu dalibai da kallo,

 “Yan makaranta nace muku a dinga tsafta. Satin sama zamu fara duban tsafta, a turance ana cewa ‘censorship day’ . Dole ne ku kara kai mi wajen tsaftace jikin ku da kayan ku dama kayan karatun ku. Mata a dinga wanka ana wanke kai, A kuma yanke farata na hannu dana kafa, Kuma dole ayi kitso, Dik bayan sati biyu za’ai sabon kitso. Kuna jina?”

Da k’arfi kowa yace,

“Eh..”

Na dubi kai na tun daga sama har kasa, Sanye nake cikin wata yarkacacciyar koriyar hyadda (shadda) da na manta sanda Baffa ya dinka mun, Doguwa ce har kasa amma Saboda tsabar tamin kadan yanzu, Ta dangale ta dawo gaba da gwiwata kadan, Zif (zipper) din ya cire, Kafata babu takauni (takalmi) farata na na hannu dana kafa duk sun yi zako-zako abun tsoro ga uban datti aciki. Gahin kai na kuwa na mance yauhe rabon dana wanke hi balle kitse hi. Ni kadai tashin wari nake yi, Rabon da nai wankan sabulu tun wanda Dara’ifa tace na siya shima ya kare sauran sa Gajiyalle ta kwace hi. Ashe na zurfafa tunani bansan an kammala assambulin ba. Kowa ya watse. Malama Mardiyya ta kira Sunana da karfi tana bubbuga yatsun hannunta biyu a kofar kunne na, 

 “Khadija..”

 “Na’am Malama..”

 “Tunanin me kike yi ne? Kinga dai barshi kije aji yanzu. An jima da break kizo ki same ni.”

“Burek? Malama meye shi.”

 “Lokacin cin abinci da wasa da ake baku Idan an kada kararrawa ta uku..”

 “Kan balastin can. Harda hi? Harda lokacin wasa? Wayyo ni Dije ba karamin hirme nayi ba da banzo tun sanda aka fara karatun nan ba.”

Malama Mardiyya tayi daria kafin ta nunomin dan banzan Malam auwal dinnan,

 “Je ki ga malamin class din. Au ajin ku can. Ki bishi zai kai ki ajin ku. Allah ya bada sa’a Khadija. Banda tsokana da fada kinji? Da anyi break kice staffroom Za’a nuna miki. Kinma ganshi can? Shine dakin malamai.”

Har ga Allah banso ajin Malam auwal Za’a kai ni ba. Domin tun had’uwar farko ni da hi jinin mu bai hadu ba. Ya tsane ni nima na tsane hi. Tsana mai tsanani ma kuwa. 

 “Malama nafuson ajin ki dan Allah!”

“Ni ajina yan kanana ne Khadija. Ki dai bishi kinji? Malam auwal nada kirki sosai, Ya nasan daliban sa suyi karatu. Amma bayasan wasa ba kuma ya shiri da masu wasa ko fada a aji kina jina?”

Saurin k’ada kai nayi alamun Eh. Na bi bayan sa da sauri, Yana ta fadan abu da wani yare, Da alamun dai zagi na yake yi. Oho masa dai. Canmakadus-dus! Karatu ne dai sai an yi hi ba fashi. Ajin mu ya kai ni. Yara suka hau tafi. Na sake buda hanci ina daddaga musu hannu. Can gefen taga ya nunamin benchi yace na zauna. Ina zama ya tayar dani Wai nafi cikakken sunana dana baba na.

“Da farko dai: Baba na na kira na da Ummi na, Saboda kasancewar sunan mahaifiyar sa da naci. Matar baba na na kira na da Dije itada wasu tsirarrun mutane a karkarar mu. Mafi yawancin yan karkarar mu na kira na da Dijengala ko Ta mai gari. Kawaye na da matasan karkarar mu na min laqabi da Dije Oganniya. S..”

“Ya isa Malama dakata. Sai zuba kike uwa’yayan kanya. Bush girl. Sunan ki fa kawai na tambaya dana baban ki zansa a register.”

“Yo ai da kayi hak’uri su dinma zaka ji ai ko? Duk sunaye na ne wanda na fada..”

 “Ke wai bakisan me kike bane? Toh Malama sunan ki na yanka d’aya zaki gayamin dana baban ki.”

 “Toh ai Baffa nama sunan sa biyu dan kaji ehe.”

Wani uban tsaki Malam auwal yaja, Ya furzar da iskar bakin sa kafin ya sake duba na kamar yaga kahi. 

 “Wallahi zan kore ki daga makarantar nan.”

 “A hayye sama lubaye! Sede in mutuwa nayi hine zandena zuwa Malam. Amma yadda kowanne yaro da yarinya yake ajin nan du matsayin mu d’aya. Mai gari ne yakarb’o tallafi awajen hakimi, Shima hakimi daga wajen sarki na birni ya samo. Shima sarkin daga wajen hyugaban kasa. Dan kaji inada matsayi kamar kowa ehe.” 

Malam Auwal ya girgiza kai kawai kafin ya sake cewa,

 “Illiteracy is a disease! Menene sunan ki na ainihi dana baban ki?”

 “Sunan da Baffa na ya radamin Nana Khadija ne. Baffa na sunan sa biyu. Alquranin Ubangiji bazan fadi na gaskiyar sa ba ai rahin kunya ne.”

 “Zauna kawai..”

Malam auwal ya fada yana dafe goshin sa, Sunan ta ya rubuta a register da ‘Nana Khadija Baffah.’ ya rufe register ransa a matukar b’ace yake koya musu darussan har aka kada kararrawar fita break. Ana futa na kwasa a guje nayi wajen Malama Mardiyya ina haki. 

 “Malama ga ni.”

 “Sannun ki Khadija.. Hakin me kike? Ko gudu ki kai? Ki dena ba’asan yawan haki. Babu ma dacewa ‘ya mace ta rika zunduma gudu kinji?”

Kada kai nayi kawai na tsugunna a kasa. 

 “Khadija ina maman ki?”

Tana fadar haka, Kwakwalwata ta shiga tariyo min sanda Ummah na ta rasu, Da wayo na lokacin. Domin har yanzu ina iya tariyo sanda ta rasu. K’asan d’ankwali na nasa na goge hawaye na dake yar tsere kafin nace,

 “Malama mahaifiya ta Allah ya mata rasuwa shekarun baya.”

 “Allahu Akbar! Allah ya jikan ta da Rahama, Kiyi hak’uri Khadija bansani ba, Da bazan taso miki da radadin ciwon rashin ta ba.”

Saurin girgiza kai na nayi kafin na sake cewa,

 “Malama a har kullum ina fad’awa zucia ta me so na shine zai tambayi wane irin hali na ke ciki. Wadda tambaya ta farko kuma mahaifiya ta Za’a tambaya. Shin tana raye ko akasin haka?.”

 “Hakane. Toh Allah ya baku hakurin rashin ta. Yanayin ki yasa na kasa samun nutsuwa a zucia ta Khadija. Shin meke faruwa dake? Menene labarin ki Khadija...?”

K’atuwar bahaguwar zuciya na sauke, Kafin na gyara tsugunnen da nayi na fara cewa,

 *TUNA BAYA....*

..

ZAFAFA BIYAR

NA KUDI NE::: 

Duka BIYAR 5 zaku samesu akan garabasar naira 700 kacal,

Guda hudu 4 Kuma 500,

Guda uku 3 Kuma 450,

Guda biyu 2 Kuma 400,

Guda daya akan 300.

Ma'ana

Each one is 300

2 is 400

3 is 450

4 is 500

5 is 700

Zaku biya kudinku acikin wannan asusun namu na banki👇👇

ACCOUNT NO- *0812652655*

ACCOUNT NAME- *HAFSAT LAWAN GAMBO*

BANK NAME: *ACCESS BANK*

saiku turawa wannnan numban shedan biyanku(evidence of payment)👇👇

*+234 903 234 5899*

IDAN KUMA KATIN WAYANE KO VTU/TRANSFER ZAKU TURA TA WANNAN NUMBER TAREDA SHEDARKU👇👇

*09033181070*

Karku Bari ayi Babu ku domin wannnan salon na daban ne

SABUWAR SHEKARA 

SABON SALO

TEAM#ZAFAFABIYAR🔥